2026/03/20
湯文亮
星期四早上去到茶餐廳，見到有一個客人唔係幾開心，佢話自己間上市公司就快要開股東大會，問題是股票市值等於資產淨值唔夠兩成，雖然派息都唔錯，但開大會時不時畀股東質問，點解股價咁殘，做上市公司主席做成咁真係無乜癮，有乜辦法可以提高上市公司股票市值。
老闆話，上市公司股票市值低過資產淨值並不奇怪，而上市公司老闆最緊要是有派合理股息，股價變動牽涉很多原因，或者因社會形勢，或者有人炒賣而影響股價，這並不是上市公司老闆責任。不過，持有那些公司的股民又唔係咁諗，無股息派當然會嘈，股價下跌嘈得仲犀利，食得鹹魚抵得渴，真係唔知點樣提高股票市值，畀股民鬧都無辦法，做得上市公司主席就要有心理準備。
老闆話有一個沒有辦法中的辦法，叫釜底抽薪，就是將公司私有化，隔幾年再將公司重新包裝上市，雖然蝕了一些上市費用，但從股價差額得益，遠遠超過私有化以及上市的費用。不過，這個方法以前比較困難，因為上市的要求很嚴謹，稍一不慎，就會喪失上市地位，但現在上市較寬鬆，如果合資格，重新上市並不是大問題。
當股民聽到公司私有化，他們又會唔滿意，明明件嘢值100元，點解要20元賣返比原主，結果就唔會咁多聲氣，倒不如在開大會時大家客客氣氣，股民食多件餅。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
