2026/03/10
湯文亮
星期日早上去到茶餐廳，有一個擁有多個物業的客人話，去年因為被銀行追差額，被迫要賣走一些物業，有一些非常優質但銀碼比較大的物業，竟然乏人問津，只能賣走一些銀碼比較小，質素一般的物業；不過，總算可以滿足銀行要求。
該客人續稱，今年又唔同，去年乏人問津的優質物業，今年有不少人有興趣，而且出價唔錯，高過去年很多，理論上現在買樓的人都是身經百戰，點解去年樓市咁殘的時候唔買，寧願今年要追價買，而且又未必可以買到靚貨，這樣做是否不合邏輯。
老闆話，做生意的人有一個邏輯，就是遇上機遇，都唔敢大投資，恐防機遇變成陷阱，就會損失慘重。所以，在樓市去年跌到相當殘，但又唔知係咪見底，就算有錢的人都唔敢大投資，但又唔想錯過機遇，於是小注怡情，就算樓市繼續下跌，損失始終有限。
今年在各方面都有利香港，就算美以伊戰事都只會對香港有利，持有大額資金的人亦知道這個情况，所以夠膽投資。雖然回報可能低於去年，甚至所買物業質素無去年咁好，但勝在風險不高，對於持有大額資金的人來說，這才是最重要因素，寧願賺少啲都唔好輸鑊甘。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
