2026/02/20
湯文亮
年廿九早上去到茶餐廳，有一個一向不在香港過年的客人問老闆，新春期間會不會休息，如果唔會，過年他會嚟飲咖啡，老闆話唔會，新春有很多茶餐廳都休息，差不多做獨市生意，點解要休息，新春開工，一工當兩工，又有利市收，伙記都唔想休息。
老闆反問客人過年點解唔去旅行，客人話舊年去旅行，錯失了一個買樓機會，物業起碼升了15％，去年在過年前，本來睇啱一個單位，諗住過完年返嚟落訂，點知已經賣咗，當時覺得無問題，有咁多專家，玄學家話去年樓市必跌，心諗塞翁失馬，焉知非福。
原來那些專家是錯的，客人今年在過年前又睇啱一個單位，代理話去旅行，返嚟先替佢搞，客人唔理佢，諗住搵另一個代理替佢落訂，唔知買唔買到。我認為客人買到的機會很大，甚至可以平些少，樓宇買賣，買家可以放假，業主則未能放假，如果有合價錢的offer，就算業主唔飛返嚟香港簽約，物業代理都會送去畀佢簽。
所以，有心買樓的話，新春假期是一個好時機，因為競爭對手放了假，對手減少，買到的機會自然大一些，不過，亦不能大幅鋤價，輕微鋤價或者可以，否則就有可能為他人作嫁衣裳。一般來說，如果打算賣樓的業主見到價錢差唔多，都會簽約賣走。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
