《老店結業 老闆必會話租金貴》

星期二早上去到茶餐廳，有一個做物業投資的客人話，現在做收租佬真辛苦，客人做唔掂第一件事就會對傳媒話租金太貴，他們唔記得當時要想盡辦法才可以租到，做唔掂只是他們未能與時並進，用幾十年前手法做生意，不用交租都做唔掂，唔執笠只是蝕老本，所以，有仔都唔好教佢做收租佬。

業主被call loan 唔敢投訴銀行

老闆話，又唔好咁講，唔係咁多做生意的人投訴業主，不過，有一些老店結業，傳媒訪問他們，當被問及點解要執笠時，唔通他們話自己做得唔好，咁即是話畀傳媒聽自己敗咗老竇副身家，唯有咬死業主話租金太貴。食得鹹魚抵得渴，做業主就預咗會俾租客鬧，不過鬧還鬧，仍然有很多人鍾意買樓收租。

有很多人唔明白，現在有不少物業投資者或者擁有多個物業的業主被銀行call loan，但好似唔見到有人對傳媒投訴銀行，話當日借錢太鬆，唔似得有一些租客，一執笠就話租金太貴。老實說，生意人或者物業投資者，知道銀行call loan是天經地義，問題上是時間是否合適，即使時間不合適，道理仍然在銀行的一邊，投訴都無用，更加唔好講壞話，而且仲會有一個反效果，以後唔會有銀行借錢畀投訴的人。老實說，現在執笠的租客如果投訴租金太貴，以後都很難有業主租樓畀佢哋，就算有都要收多啲租，或者可以叫做投訴費。