《格陵蘭只是分裂歐洲工具》

星期日早上跑完步去到茶餐廳，聽到有客人話真係唔明白特朗普想法，美國明明已經在格陵蘭島設有基地，人數比丹麥駐軍500人還要多出300人，而且仲可以隨時加人，不用徵得丹麥同意，而為美軍設計的基地可以容納1萬人，究竟特朗普點解要強佔格陵蘭島，搞到同歐洲的關係咁差，唔通格陵蘭島真係咁重要，或者真係有咁多稀土。

老闆話，自從歐盟成立，每一位在任美國總統都想盡辦法分裂歐洲，英國雖然首先脫歐，但對歐盟影響不大，俄烏戰爭打了3年，歐盟不但沒有解體，仲愈打愈團結，雖然美國不再支持，但歐盟仍然繼續。其實，歐盟想唔繼續都唔得，烏克蘭如果戰敗，歐洲國家就會被俄羅斯逐個清算，或者要倒向俄羅斯，美國雖然希望歐盟解體，但又不想歐洲國家倒向俄羅斯，所以，美國要用不戰而屈人之兵方法來令歐盟解體，而格陵蘭島就是令歐盟解體的工具。

講明是不戰而屈人之兵，所以，美國是不會增兵格陵蘭島，代之而起就是反對美國佔有格陵蘭島的歐洲國家加徵關稅，2月1日起要多付10%，到了6月1日，就會增加到25%，到時，一定會有歐洲國家勸丹麥接受美國收購，歐盟解體正式開始。當然，歐盟如此龐大的組合，唔會為單一事件而解體，不過，在格陵蘭島之後，美國的新招陸續有來，歐盟解體是最後必然結果。