2026/01/16
湯文亮
星期四早上去茶餐廳，有年輕客人話近日買了一個小型單位，代理在成交前一定可以「摩」得走，於是昨晚去了蘭桂坊，咁啱又識了一個女仔，過了一個非常愉快的晚上。早上離開前，約定今晚再見，但現在心大心細，如果今晚唔見，點樣推那個女仔；如果今晚見面，又擔心最終做了自己女朋友，玩一夜情變成做女朋友，名副其實的短炒變長揸，會被人笑。
老闆話，古代人都會玩一夜情，亦會有相同遭遇，如果大家唔想見面，就會話「昨夜星辰昨夜風」，一夜情就好似昨夜星辰一樣，天光就無晒。如果女仔死纏爛打，要求大家再次見面，就會話「身無彩鳳雙飛翼」，意思是我都好想嚟，但可惜無一對翼飛唔到嚟，仲可以繼續話，雖然我嚟唔到，但「心有靈犀一點通」，大家在心裏仍然可以溝通，雖然唔再見面都要講得好聽啲。
女仔可能會話點解今早不辭而別，最好的理由就是夠鐘要返工，尤其是香港人，十號風球都趕住返工。古人的理由也是一樣，「嗟余聽鼓應官去，走馬蘭台類轉蓬」，返工大過天，亦是離開女仔最佳藉口。
有不少人覺得很奇怪，有不少資深炒家，最後被人發覺擁有不少質素不佳物業，以他們經驗，應該可以避免。其實，他們最初並不打算擁有那些物業，只是想「摩」一轉，但結果是「摩」唔走，短炒變了長揸，資深炒家都會犯錯，何况玩一夜情的年輕人。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
