《委內瑞拉石油似陳年滷水》

星期二早上去到茶餐廳，有客人話星期日晚去了一家老字號潮州菜食肆，一般食物質素都保持到，唯獨是滷水唔掂，無論是滷水鵝或者其他肉類，都不及以前風味，簡單來講就是滷水太新。

老闆話，那一家潮州舖已經轉咗手，新買家唔知道滷水要時間沉澱，無要求舊老闆留低盤陳年滷水，所以，現在做出來的滷水鵝等唔夠味道，現在已經同舊老闆講數，希望可以將盤舊滷水賣畀佢，下次去食飯，可能有驚喜。

很多人話，美國佬捉委內瑞拉總統馬杜羅是為了石油，但是石油價格在1973年第一次石油危機時，每桶超過100美元，現在唔使60美元，當時咁貴是因為大家認為在不斷開採之下，石油存量很快枯竭，但後來發覺，石油好似人體血液，只要唔死，一直有血液輸出。既然如此，美國點解仲要大費周章，甚至觸犯國際法拘捕馬杜羅，被全世界指摘，似乎得不償失。

美國捉馬杜羅的確是為了石油，因為委內瑞拉所生產的是重石油，適合重工程或作飛機燃油，而全世界大多數地方所出產的石油是輕石油，只適合汽車之用，就好似陳年滷水與新滷水分別。其實，美國早已有控制委內瑞拉企圖，國內煉油廠大多數是準備提煉重石油，如果能夠扶植反對派上台，就唔使捉馬杜羅咁肉酸，但特朗普想唔到，剛奪得諾貝爾和平獎的反對派領袖馬查多的確想做總統，但唔想做賣國賊，所以最後由副總統接任，委內瑞拉一切如常，特朗普大費周章捉馬杜羅，只是捉了個寂寞。