《買港樓不用怕「二次爛尾」》

聖誕節過後去到茶餐廳，聽到有客人話剛從內地回來，仲話以後只會在香港買樓，唔使擔心爛尾，在其他地方買有可能收咗樓都會出現爛尾，客人咁講大家都不明白，收咗樓點解都會出現爛尾。

原來客人在外地買了一個單位，以往在周末返去小住，但在新冠疫情之後就很少回去，不過仍然有交管理費，在今個聖誕假期同家人回去小住，發覺整個小區都是烏燈黑火，與最初入伙時燈光火着大有不同，問管理處，答案是愈來愈少人在小區居住，甚至在周末，本來每周會到來的香港人都「失蹤」，搞到小區唯一酒樓都結業，只靠一間茶餐廳頂住，不過，就算只得一間茶餐廳，生意都唔係幾好，都唔知可以捱得幾耐，不少業主已經在放盤，樓價梗係大幅下跌，有業主話過得初一，過唔到十五，樓盤雖然冇爛尾，但如果冇人住，樓價大跌，都可以算是二次爛尾。

老闆話，有很多人不明白，點解咁多內地人在香港買樓，其實爛尾就是主要原因，除了發展商交到樓，令樓盤爛尾的情况是不會出現之外，另外就是新樓盤在入伙之後不足一年就會住滿，各項配套亦到位，唔使擔心屋苑冇人住的二次爛尾，老實說，新樓盤樓價是否上升決定於該樓盤的入住率，如果入住率很低，即使新樓盤已經全部賣晒，樓價不但不會上升，甚至會逐步下跌，最後出現二次爛尾，內地買家不是傻的，他們早已知道什麼是二次爛尾，所以才樂於在香港買樓。