2025/12/23
湯文亮
星期日早上去到茶餐廳，有客人話非常勞氣，一年多前將自住單位賣走，然後售後租回，但想唔到買家竟然是叫他賣樓的老友。
茶客賣樓 發現老友接貨
在賣樓之前，那名老友不時引用分析員、玄學家話樓市最少跌兩成，叫他將自住單位賣走，客人的老友講到似層層，最後連他的老婆都叫佢賣樓，老婆叫到想唔賣都唔得。客人要求售後租回兩年，買家亦輕易答應，到現在續租，他才發覺業主就是成日叫佢賣樓的老友，今次真係日防夜防，家賊難防。
老闆話唔係，應該是「家賊易防，閨密難防」，不少已婚婦女本來有一個唔錯老公，但唔知點解，那些女人總會搵到一些小事來挑剔她的老公，本來是無傷大雅，但那些女人好喜歡將老公缺點同閨密講，女人的閨密當然企在她的一邊，大家一齊數那個男人的不是，愈講愈激氣，本來是一些小事就講到殺人放火咁大件事。
在適當時候，女人閨密會慫恿她離婚，一次唔得就兩次，最後女人始終離婚，離婚後女人的前夫很快就再婚，女人會發覺，前夫的老婆就是慫恿她離婚的閨密，仲唔係家賊易防，閨密難防。
測量師看淡樓市又畀offer
我有不少類似經驗，上午睇到測量師在報紙發表樓市大冧分析，下午他們就攞個offer畀我，我周不時都會多口問句，既然睇得咁差，又點會有客買？測量師都係老友，佢會話唱淡都是職業所需，大家唔唱淡，業主唔肯賣樓，他們無生意做，唱淡都是為勢所迫，資深的業主一定識得分析。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
