2025/12/22
湯文亮
星期日早上去到茶餐廳，有客人話，如果唔使畀關稅，在內地海南省買車就好抵，一輛100萬元（人民幣，下同）汽車，關稅、銷售稅、增值稅加加埋埋，大約佔一半，唔使畀稅，50萬元就搞掂。唔怪之得有人同佢講，只要畀5萬元留位費，等那人集中多14個申請者，就會幫佢申請，仲講明申請唔到原銀奉還，50萬元加多5萬元，仍然好抵。
老闆話，邊有咁大隻蛤乸隨街跳，汽車免關稅早在2021年已經實行，並不是新鮮事。無錯最少要15輛車才可以申請，但不能夠分拆，個人消費者是不能夠享受，只能用作公務，並且那些免稅車在一年之中，只能有120日在其他省份使用，就算買到免稅車都無用，就好似香港電動的士咁樣，寬減了首次登記稅，但聽唔到有人買架的士作為私家車。
付留位費 多去如黃鶴
客人唔服氣話，申請唔到原銀奉還，沒有損失，客人唔知道，原銀奉還是無了期，以前，香港買新樓是不用抽籤，但僧多粥少，於是有人話直通發展商，在新樓盤推出發售時可以用職員名義購買，不過就要交留位費。老實說，就算交了留位費都好抵，買入之後轉手就會賺一筆比留位費多很多的利潤，不過，那些留位費大多數去如黃鶴，我自己未聽過有人成功交留位費之後可以買到新樓。
不過，唔係無機會，就是開售時樓市很差，發展商有大把單位賣唔出，要買樓，交唔交留位費都無所謂，交了的留位費就「飲了雪水」。其實，有無所謂留位費？一定無，因為收留位費的人根本唔識發展商，所以，海南省封關之後，一定要「小心提子，提防騙子」。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
