2025/12/18
湯文亮
星期三早上去到茶餐廳，有客人同老闆講，想在星期日晚包下茶餐廳給他的兒子向女友求婚，但不能夠講明是私人聚會，普通客人都可以入嚟食飯，因為他的兒子想營造一個即興氣氛，仲請大家幫幫忙，當晚如果在場，在適當時候起哄，叫他兒子的女友嫁畀佢。
大部分客人都話當晚是家庭日，未必可以參加，但預祝客人的兒子求婚成功，老闆話會預留地方，盡量叫多啲客人嚟。
客人走了之後，老闆話「唔做中，唔做保，唔做媒人三代好」，人哋求婚，其他人起哄，即使強迫被求婚的人做決定，或者唔知道如何拒絕，很多時都會做錯決定，對被求婚的人不公平。求婚是兩個人的事，應該畀足夠空間時間給被求婚的人考慮，唔應該涉及其他人，所以，當晚無乜必要都唔好嚟茶餐廳食晚飯。
其實買樓也是差不多，都是一個人或者兩夫婦做的決定，如果問多幾個人，結果同求婚是相反，大多數人唔會贊成買樓，就算那些人已經有幾層樓，甚至因為有樓而成為高級中產，都唔贊成別人買樓，無樓的人更加不在話下，更加唔會贊成別人買樓。所以，結婚與買樓是個人的事，唔好問其他人，前者令對方做錯決定，後者令自己做錯。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
