《唔踩紅線先會做到生意》

星期一早上去到茶餐廳，有客人話昨日返到舊中學演講，主題是社會百態，以及讀大學心得，想唔到非常受歡迎，講完之後不少學生要求同佢影相，仲玩自拍，原來受到學生歡迎係咁開心。

老闆話絕不奇怪，法國總統馬克龍去中國訪問，受習主席歡迎不在話下，仲有盛大檢閱儀式，又可以同「莎莎」（孫穎莎）打波，但始終不及在訪問四川大學時，受到大學生歡迎，馬克龍的童真都出晒嚟，估計以後中國在接待其他國家元首訪問時，探訪大學是一個重點。

馬克龍開心 或因法企訂單豐收

不過，受到學生歡迎當然開心，但如果未能完成任務，同行的法國企業家做唔到生意，賣唔到空巴飛機，是否會同學生打成一片都是一個疑問，估計法國企業家的訂單爆晒，馬克龍無後顧之憂，所以可以同學生玩得咁放。

如果大家做生意，中國要求很簡單，就是唔好踩紅線，學日本當然唔得，就算好似德國外交部長所講，一個中國政策是根他們自己演繹，咁樣講就唔使嚟，現在俾馬克龍飲了頭啖湯，英國佬、西班牙佬又跟住嚟，唔知德國佬有冇後悔，但德國有「保險章」，就是另類選擇黨，女黨魁魏德爾擺到明是親華，如果由另類選擇黨執政，中德局面是徹底改變，老實說，現在不是太壞，不過雙方會更好，當魏德爾訪華時，我相信國家一定會安排大批學生與魏德爾見面，在見面之前，一定會做到大批生意。