《樓價會從低位反彈85%？》

星期四早上去到茶餐廳，有客人話今次大鑊了，剛剛「摩走了」一個單位，賺了10%，但「老施」（中原集團創辦人施永青）突然話，樓價有機會在未來6年低位回升85%，中原指數由135去到250，本來是開心事，但想深一層，「摩走」的單位豈不是蝕了75%，想唔到有錢賺仍然是輸家。

老闆話又唔能夠咁樣講，賺咗錢如果有信心的話可以投資，基數大了，賺得仲多。不過，很多人賣樓之後就唔敢再買，否則就可以做「摩王」，不過有錢賺就是好事，唔好怨天怨地。很多人唔明白，點解「老施」突然改變口風，其實都是做生意，代理見鋤唔到業主，唯有唱好樓市，希望買家追價，6年升85%的確很吸引，就算現在已經以低價反彈10%，但仍然有75%水位，物業代理會同買家講唔買就笨。

每年保持雙位數升幅不易

老實說，我相信在未來6年，樓市是會上升，但不是每年都升，如果沒有不可抗力情况，樓價在6年後一定會高過今天，但有沒有85%咁多，我真係唔敢講，因為樓價在低通脹之下，每年要保持雙位數字升幅，真係唔係咁容易。其實，6年後有50%升幅都唔錯，唔好忘記，物業並非像黃金或者比特幣不會產生利潤，物業是有租金收取，自住的話唔使畀租，如果有85%升幅，一定要香港的經濟非常好，人口急升才可以做到。