2025/11/27
湯文亮
星期三早上去到茶餐廳，老闆問我識唔識得太興（6811）陳永安，我話何止識得，太興仲係我們的租客，旗艦店是我們的舖位，交租非常準時，不時有人叫我們割愛，同事都唔捨得，那個舖位是我們重點保護的物業之一。
老闆問我知唔知陳永安已經過身，我當然知道，但對太興應該無影響，在安少過身之前，太興業務早已交畀個仔打理，當大家擔心北上消費，太興2025年上半年純利超過4000萬元，按年大幅增加2.8倍，真係勁。
有客人話真係好奇怪，香港茶餐廳點解可以做得咁好。老闆叫我講，我話只可以拾人牙慧，多年前的一個星期日，我在海濱長廊跑完步，一個人去中環太興食個黯然銷魂飯，加一隻鵝脾，見到陳永安同佢伙計，陳永安話，香港茶餐廳做得咁好，就是政府做了一項德政，不過，政府從來無表達出來，這就是禁煙，如果沒有禁煙，現在最少有一半茶餐廳不會存在。
因為禁煙多一批女性及不喜歡吸煙的客人，如果茶餐廳准吸煙，試想一想，枱面有一個污糟邋遢的煙灰盅，以及同枱客人吞雲吐霧，又點會幫襯。現在就唔同，乾乾淨淨，食物又好又快，所以就算有咁多茶餐廳都可以生存，甚至揚威國際，在外地的茶餐廳都標榜是港式茶餐廳。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
