2025/11/17
湯文亮
星期日去到茶餐廳，有客人話，古代人認為「久旱逢甘雨，他鄉遇故知，洞房花燭夜，金榜題名時」是人生最開心的時候，現在當然唔係，究竟現代人認為什麼是人生最開心的事？有人認開賭場是贏梗，應該是最開心。
老闆話，開賭場的皮費很大，雖然是贏梗，但贏埋贏埋都未必維到皮，澳門已經有幾家衛星賭場執笠。
不過，人生最開心的事都是同賭有關，就是逢賭必贏，試問一個人賭乜都贏，仲唔係最開心，不過，排第二是什麼，老闆話連佢都唔知。老闆唔知，但係我知，排第二就是買樓收租，如果有錢買樓收租，每月都有租金收入，同人講唔開心都無人信。不過，最緊要唔好借咁多錢，最好唔借，最多無租收，但唔需要畀息。
不能逢賭必贏 不如買樓收租
有客人問，香港KOL之中，邊個的名字最謙卑，老闆話，應該是大紅人「小斯」，古人叫「小廝」，比店小二仲要低一級。
最近小斯以1.36億元買入北角全海景新樓，立刻引致酸風四起，有其他KOL話，有錢點解要買樓，很容易輸死，不如買美債。
那些KOL唔知道，如果順風順水搵到錢，但又唔知可以搵幾耐，除了自住之外，最好買樓收租，千祈唔好亂咁投資或者做生意，才可以安享晚年。今日白雪仙仍然可以享受生活，就是幾十年前，與任劍輝拍檔做粵劇搵到很多錢，做生意同賭錢都是一樣，如果不能逢賭必贏，不如買樓收租，仙姐才可以安享晚年，小斯做得對。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
