《現在買樓賣樓 雙方都要捨得》

星期四早上去到茶餐廳，見到一個做物業投資的行家在座，佢話近日被銀行追差額追到失魂，如果再賣唔到樓，手上有部分物業可能會被銀行沒收，不過唔係無offer，但是買家要買他的優質單位，行家唔捨得，只希望買家買他的普通單位，結果傾唔成，最後要畀銀行call loan。

一般物業投資者都有一個通病，就是就算被銀行逼賣樓，都唔捨得攞啲靚樓出嚟賣，當買家見到那些單位唔係咁靚，通常都會話以現時環境，價錢還是其次，點解要買那些不甚優質單位，如果物業投資者早啲攞靚單位出嚟賣，可能早已解決銀行追差額問題。所以，當投資者有迫切需要賣樓，最重要就是捨得，否則就會浪費寶貴時間，甚至錯失賣樓良機，最後物業變成銀主盤，銀行攞出嚟賣，到時候唔捨得都要捨得。

話口未完，有客人話，最近睇啱一個非常優質物業，業主叫價亦非常合理，或者略高於市價，但身邊的朋友同佢講，現在買樓，一定要鋤價，結果買唔成。後來發覺物業以高價賣了畀人，非常後悔，再同朋友講，點知朋友話都是為他慳錢，買唔買的主動權在客人手上，點能夠怪佢。

老闆話，這些事都習以為常，買樓千祈唔好同塘邊鶴講，否則多數買唔成。賣樓要捨得，其實買樓一樣要捨得，持有優質物業的業主要價有可能畀市價稍高，但優質物業是可遇不可求，錯過了機會以後很難買到。