《華府唔出糧 公僕唔敢控告》

星期一早上去到茶餐廳，有客人話非常激氣，上星期公司會計有急事請假，未能及時出糧，竟然有伙記去勞工處告佢，食完早餐之後要去勞工處接受問話，要時間解決。

無論結果是什麼，在外人嚟睇，唔出糧一定係公司唔啱，點解釋都冇用，對公司形象一定唔好，希望銀行唔好藉此機會call loan。

老闆話，如果去勞工處解釋，不如博一鋪，同勞工處講，唔出糧是因為未得到大部分董事同意，本來這不是理由，但現在美國政府停擺，美國公務員有40日冇糧出，不少公務員要攞救濟食物，所持的理由就是民主共和兩黨在某些問題未能取得共識，所以，用這個理由向勞工處解釋，或者唔使罰，如果勞工處罰茶餐廳客人，甚至要賠償畀伙記，即是話美國政府唔啱，同樣地要賠償畀公務員，不過，相信美國公務員唔敢要求政府賠償，有糧出已經偷笑。

其實，以美國咁大國家，一定有機制防止政府停擺，如果公務員罷工，政府可以強制他們返工，但如果政府唔出糧，美國法院亦應該強制美國政府出糧，不能因為共和、民主黨講唔掂數，而令美國政府停擺，否則如果出現大問題，例如美國受到恐襲，美國最高法院要負一定責任，如果美國最高法院不過問，咁樣要最高法院嚟做乜，在香港，老闆唔出糧畀伙記，法院會強制他們出糧。