《廠家或成樓市大贏家》

星期四早上去到茶餐廳，有一個一向唔睇好樓市，只是埋頭苦幹做廠的客人，最近買了一幢非常優質、價錢合理的寫字樓。茶餐廳老闆話不明白，點解那名廠家客人可以忍到現在，時間恰到好處才出手，好似知道樓市會調整。

客人話，在過去他不是不想買樓，但一來價錢太貴，二來做廠亦需要大量流動資金，唔敢將現金買樓，直至最近，埋單計數，知道自己搵到不少錢，現金流充足，所以才夠膽買樓。到買樓的時候又發覺，今日的樓價比幾年前平了最少三成，而且仲有很多選擇，當中不乏一些非常優質物業，而自己就算唔問銀行借錢都有能力買樓，所以下定決心。不過，又大話夾好彩，倘若當日問銀行借錢買樓，不但輸了樓價，並且會造成現金流不足，影響自己的生意。所以，即使是廠家或者生意人，入貨時間可以決定他們是否可以成為樓市大贏家或者是輸家。

有一些廠家，過往唔敢買樓，到現在自己負擔得起，但仍然唔敢買，擔心樓價會繼續下跌。其實，香港樓市都係三衰六旺，升市多過跌市，在利息下降，香港人口不斷增加之後，樓市一定會止跌回升，如果現在搵到錢，而始終唔肯買樓的廠家，他們都是贏家，但不能稱他們為樓市大贏家。