《鮑威爾識做官》

星期一早上去到茶餐廳，聽到有客人講，美國聯儲局主席鮑威爾真係跟官唔知官姓乜，總統特朗普既然想減息，點解唔順吓佢意，就算效果唔好，都係特朗普孭鑊，上星期議息都算好，減了四分之一厘，但點解佢話12月減息機會不大，其實唔講都可以。

老闆話，很多人都以為鮑威爾同特朗普作對，其實，鮑威爾絕對識得做官，甚至可以說是專家。老實說，順應特朗普的意思，減息是很容易，但停止縮表之前，唔應該減太多息，鮑威爾現在表明即將停止縮表，代表可以減息。如果由縮表進化至量化寬鬆，就可以大幅減息，特朗普就一天都光晒，如果畀着一個唔識做官的人，就會立刻停止縮表及減息，如果效果理想，自己有一份功勞，唔理想當然由特朗普孭鑊。

留下任主席再減息 將歸功特朗普

中國古代大官在離任前，一定搞到民不聊生，怨聲載道，新官上任恩威並施，就好容易管理兼得到理想效果；反之，如果大官在離任前推出各項利民政策，甚至開倉派米，新官上任就很難做，離任官員隨時會被「燉冬菇」，理由是好官邊個唔識做。

鮑威爾在特朗普壓力之下，打死都唔肯大幅減息，到了明年5月，鮑威爾離任之後，新任美聯儲局主席一定會加速減息，在美債以及個人負債高企之下，減息是有利美國及美國人民，屆時，大家就會多謝特朗普，並且責成鮑威爾點解唔減息。其實，鮑威爾是可以現在減息，但是佢識得做官，所以唔減。