2025/10/31
湯文亮
星期四早上去到茶餐廳，一切如所料，美國聯儲局減息四分之一厘，美國航母尼米茲號走了，如果特朗普唔玩嘢，中國貿易協議可望由習主席與特朗普簽定，中國恢復購買美國大豆，恢復供應稀土一年。當我們正在吹水時，有同事嚟茶餐廳搵我。
同事話，有一個客人，與他的舊業主鬧翻，打算租用我們相若物業，由於客人已經無退路，租金可以要多兩成，我話無論要多要少，那名客人始終唔會租用我們的物業，因為他與舊業主非常老死，又有多少親戚關係，鬧翻只是暫時的，根本唔會唔租。我們要高兩成租金，傳到市場就變成不良業主，倒不如要價低市價一成，就算租唔成，都唔會畀人話趁火打劫，同事話明白。
坐地起價失去信譽
中國唔向美國買大豆，最初轉向巴西，巴西豆農以為天降財神，立刻加價三成，中國買家再轉向阿根廷，價錢與美國相若，現在中美貿易協議即將談妥，中國將會恢復向美國購買大豆。不過，點都會留返多少畀阿根廷，巴西當然無份，巴西豆農不但做唔到中國生意，仲畀人話坐地起價，不但自己受損，而且仲令到巴西失了信譽，唔明白巴西豆農點解咁短視，今次真係自己玩死自己。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
