2025/10/17
湯文亮
有老友移民幾十年回流香港，昨晚去銅鑼灣食晚飯，非常激氣，原因是想食一些貴價海鮮，點知餐廳欠奉，只介紹了一些在魚缸裏的海鮮給他，又貴而且一睇就知已經養咗幾日，唯有叫晚飯小菜，餐廳經理面口又唔係幾好睇。老友記得他在移民前去銅鑼灣晚飯，幾夜都有新鮮海鮮，點解以前有，現在無。
老友離開太久，銅鑼灣食肆起了變化，以往有一間德記海鮮，負責供應各高級食肆的海鮮，收費當然貴一些。但那些高級食肆唔使備貨，唔使請魚王，唔使設魚缸，又沒有損耗，無形中慳了不少錢，就算條海魚「沙皮」都由德記負責，理論上畀貴些少都划算。但做生意的人太識計算，要賺盡每一分錢，德記無生意唯有執笠。
德記執笠之後，食客去到那些高級食肆，往往食唔到想食的海鮮，例如「黃勒」變東星，一斤重變兩斤重，一兩次之後，客人便不會再去那些高級食肆。如果德記仍然生存，那些高級食肆生意一定還有得做，有時做生意真係唔能夠計得太盡，否則最後受損的都是自己。
我叫老友不用擔心，一樣有新鮮海鮮食，幾個人去街市揀一些靚海鮮，跟着攞去一些打麻將的會所叫他們加工，風味差不多，不過地方「屈質」一些，但比高級食肆平好多，又可以食到自己鍾意的海鮮。老友話，「屈質」算什麼，最緊要幾個老友食得開心，叫乜無乜，又點會開心。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
