2025/10/08
湯文亮
中秋節翌日假期早上去到茶餐廳，有客人話昨晚與老婆把酒問青天，點知畀老婆噴到一面屁，客人老婆話佢揸十幾個物業，住宅舖位都有，現在不但樓價下跌，仲要畀銀行call loan call到失魂，而客人老婆揸住幾十個比特幣，不但唔使畀銀行call loan，而且仲愈升愈有，雖然老婆同佢把酒問青天，但始終無乜癮。
老闆話，並不是物業與比特幣的比較，而是他們的負債，一般人買比特幣都唔會問銀行借錢，銀行又點會call loan，所以無必要就唔會賣走，而且挖礦人士會托住個價，所以比特幣不會下跌，或者暫時不會下跌。由於每一枚比特幣挖礦電力成本不足兩萬美元，市場上已經唔知有幾多平價比特幣，總有一日，比特幣會大跌，這點買比特幣的人都知道。
現金買比特幣 不憂銀行call loan
不過，如果用現金買，首先唔使擔心銀行call loan，或者趁價錢好而賣走多少，他日價錢低吸納返一些，買買賣賣，他日即使比特幣大跌，都唔會損失慘重。老闆強調，他並不是話比特幣會大跌，現在邊度會有人話比特幣大跌。
買樓就唔同，買樓除了資產之外，仲買落一筆債，商業物業還好，最多借五成，所以債務只是五成；但住宅物業，如果是自住的話，可以借足九成，即是買樓之餘，同時買入一筆相等樓價九成債務，債務不會變而樓價會變，當樓價下跌，銀行就會call loan，逼債仔賣樓。買比特幣就唔同，由於持有者沒有欠債，無人會強迫他們賣比特幣，比特幣又點會跌，所以，都係買比特幣好過買樓。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
