《秘密最多守一日》

星期一早上去到茶餐廳，大家都在討論食放題打包返屋企事件，又唔好以為是聲討那名打包客人，而是店家點解要將事件放上網公審，最初當然是一面倒話客人唔啱，但後來有不少人改口風，認為店家如果唔想私下解決，可以報警處理，放上網就唔啱。店家亦知道犯衆怒，急急忙忙解釋拍片是作為教材，已經叫員工保密，唔知點解流出街，非常遺憾，現在除了那名客人之外，放題店亦是最大受害者。

有客人問老闆，如果見到某個客人私下攞走一些刀叉用具，會如何處理，老闆話如果數量不多，當自然損耗，不過又沒有客人會攞走大量刀叉用具，畢竟那些用具很便宜，今次放題店處理得唔係咁好，不過，經一事長一智啦。

簽保密協議也不保密

今次關鍵在於點解作為教材的短片可以流出街，放題店已經叫員工保密，其實，秘密最多只能守一日。我做買賣，經常都要簽保密協議，但完全無作用，試過最快一次是在新加坡，我簽完合約及保密協議，未到15分鐘，還未離開會議室，已經有人問我是否已經買了那個物業。我問處理交易的新加坡人，佢話無辦法，香港寫字樓話市民有知情權，所以，一定要通知記者。我真是覺得奇怪，既然一早知道唔可以保密，點解仲要簽保密協議。

現在的YouTuber經常揭人私隱，理由是市民有知情權，好似明星話，佢同老婆感情關你屁事，點解要知道；就算放題店知道邊個將影片流出街，只要那人講市民有知情權，放題店都無辦法責罰那人。不過，針唔拮到肉係唔知痛，YouTuber絕對知道，揭人私隱者最擔心就是被人揭私穩，所以才會用乜哥物哥，唔敢畀人知道真名。