《政府對樓市不變應萬變 無再出招才是最佳做法》

打完風返工，去到茶餐廳聽到有客人話，有一個做物業投資的朋友對《施政報告》非常失望，特首對於樓市全不着墨，既無200億元投資基金，又無將100元印花稅物業價值上限由400萬元推高至600萬元；中小企可以還息不還本，但投資物業唔可以，金管局又不放寬逆周期措施，樓價睇怕會繼續下跌。老闆話，物業投資者怕樓市繼續下跌，所以才咁樣講。

老闆繼續話，做人最緊要有「吉士」，300名韓國工人被美國政府以非法入境又拉又鎖，最後299個走人，只得一個留低，全世界都話韓國人有「吉士」，香港物業投資者點解唔可以？如果香港政府聽從投資者意見，設立200億元投資物業基金，放寬100元印花稅上限，容許投資者還息不還本，以及放寬逆周期措施，而最後樓市急速反彈，甚至失控，李家超想唔起身都唔得。所以，政府保持現狀，以不變應萬變才是最佳做法。

而影響樓市的最重要因素，就是人口增加，事實上放寬專才、優才、投資人士及學生來港，已經是對樓市最大支持，世界上沒有一處地方人口增加而樓價下跌，其次是成交量，現在成交量不俗，新樓成交連續8個月破千宗，估計9月亦不例外，代表樓市很快會作出反彈，就算唔回升，最低限度已經止跌。

中原指數已經反彈，上星期五是今年新高，估計在未來3個月會有不俗升幅，那些話樓市今年跌兩三成的人已經失了蹤，再其次是租金，租金已經連升多月，樓價很快就會跟隨，所有投資者都了解上述3個因素，點解自己唔可以有些少「吉士」，毋須叫政府幫手。