2025/09/25
湯文亮
星期三早上，在10號風球仍然高懸下去到茶餐廳，竟然有不少客人在座，伙記照常返工。有客人問伙記點解10號風球仍然返工，伙記話住得不遠，唔返工又無嘢做，而且老闆又出到三工，所以咪返工，客人問點解老闆又唔加價，是否回饋顧客。
老闆話唔係，如果加價就會畀熟客話趁火打劫，做衰個口碑，甚至會畀人鬧同的士司機落雨冚旗加價有什麼分別，就算唔加價都唔會蝕，只是賺少一些，伙記又開心，客人又有地方飲咖啡，何樂而不為。
今次樺加沙襲港，香港的防風措施的確做得唔錯，雖然有人話8號風球可能掛早咗，到入黑很多地方仍然很平靜。其實，全世界都預測樺加沙是一個超強颱風，早些掛8號等大家可以一早返屋企，如果六七點才掛，街上塞滿人，有意外就會畀市民指摘，政府與天文台其實做得唔錯。
老闆話，沒有比較就沒有傷害，樺加沙在襲港之前先襲台灣花蓮，造成14人死亡，如果發生在香港，政府一定會畀人鬧到發癲。到現時為止，除了去觀浪的一家四口發生意外，仲未聽到有傷亡消息，台灣花蓮人口31萬，香港750萬，如果香港沒有意外死亡，政府防風措施以及市民意識應該抵讚。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
