2025/09/24
湯文亮
星期二早上打風前夕，整個香港都有山雨欲來風滿樓的感覺，不少食肆早已宣布星期二晚及星期三全日休息，街市超市被搶購一空，每斤菜芯賣到50元，有人話搶錢，但明買明賣，唔算係搶。去到茶餐廳聽到有客人問老闆點解唔加價，就算加三成都大把人幫襯。
老闆話加一日半日，做壞名聲，要加價就要學特朗普，關稅一加，就唔知加幾多年，而且長加長有。雖然有學者話，加關稅是羊毛出在羊身上，最終由美國人埋單，但美國人無咁醒目，以為關稅是由生產商付，所以反對聲音很少，特朗普基本上是成功的。
打風坐地起價 做壞名聲
老實說，真係無辦法唔讚特朗普，見到商品關稅成功，立刻推出「人力資源關稅」，將H1B簽證由幾千美元大幅提升至十萬美元，特朗普當然話希望美國人可以請返美國人。
話就係咁話，但美國沒有咁多高端科技人才 ，否則都唔使輸入，徵收人力資源關稅其實是削弱美國競爭力。不過，唔係咁多美國人認識到這個道理，他們會認為特朗普做得極對，除了要多聘用美國人之外，仲會為庫房帶來千億美元稅收，而且長收長有。
有客人話，今次中國大鑊了，一定會為美國人力資源關稅貢獻不少，老闆話，對比印度，中國只是小兒科，千億關稅，印度佔七成，中國佔一成半，莫迪頭都痛埋，都唔知點收科，唔通真係要向特朗普投降？
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
