2025/09/23
湯文亮
星期一早上去到茶餐廳，有一個以往在星期日都會北上消費的客人話樺加沙來勢洶洶，茶餐廳都唔知會不會關門，於是走去超市買一些預製菜。
預製菜最大路一定是咖喱牛腩、梅菜扣肉及酸菜魚，但發覺那些預製菜與內地很多大型連鎖餐廳的味道差不多，尤其是酸菜魚，簡直是無分別，在西貝預製菜事件公開之後，客人話自己好笨，山長水遠北上食預製菜，以後都唔會去。老闆話，做食肆要降低成本，其中一個方法是用預製菜，但是不能講畀顧客知道。
其實，內地一般大衆化連鎖食肆，大多數用預製菜，西貝標榜自己是高級食肆，唔會用預製菜，才搞到咁大件事，連鎖食肆分店只是翻熱，講得好聽就是中央廚房，管理集中，唔好聽就是翻熱，所以Omakase才會咁值錢，因為Omakase無得用預製菜。
每個星期六、日都有很多市民北上消費，購物就唔會，遊山玩水亦唔玩得咁多，最主要是飲飲食食，不少消費者認為，北上消費，畀少一半價錢就已經有香港質素，點解要在香港消費，不如留返啲錢在周末北上消費。
現在發覺不少食肆原來是用預製菜，不如在超市買些預製菜返屋企翻熱，不但慳返好多錢，而且仲唔使舟車勞頓，慳埋慳埋啲錢，久唔久可以出街食餐好嘅，無形中令北上消費的人留港消費，今次預製菜事件可能救返香港。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
