2025/09/19
湯文亮
星期四早上去到茶餐廳，有客人話《施政報告》對樓市的着墨甚少，沒有200億元救市基金，亦沒有提高100元印花稅物業價值的上限，更加無放寬逆周期措施，連還息不還本都無提，令不少物業投資者非常失望。
老闆話，物業投資者應該有多少「吉士」，樓價上升就話自己眼光準，樓價下跌就叫政府出招救市，輸打贏要，唔怪之得有咁多人鄙視物業投資者。至於點解仍未放寬逆周期措施，老闆話唔知點解。
在《施政報告》公布當日，彭博話有香港大銀行尋求向外國基金出售投資者抵押物業，解決投資者的投資貸款，有YouTuber立刻話，投資者的物業有四成按揭貸款，另加三成投資貸款，現在商業物業普遍下跌了四成，甚至五成，早已資不抵債，所以，樓市非常唔樂觀。
那名YouTuber無講最重要的一點，三成投資貸款所得的資金點解突然消失，如果買股票，起碼賺三成，買金賺兩成，買比特幣隨時賺超過一倍，就算唔賺，甚至蝕多少，三成資金得返兩成，都唔會畀銀行賣樓，而令到三成投資貸款「清零」只有一個可能，就是買債券。不少發債公司違約，甚至「清零」，買債券的人連渣都無，突然間多了三成投資貸款，想唔死都唔得。
特首在《施政報告》無提及放寬逆周期措施是正確的，而事實上未解決投資貸款問題之前，金管局是無可能放寬逆周期措施，否則就會令銀行不良貸款增加。現在銀行開始出售有投資貸款的抵押物業，在完成或者接近完成的時候，金管局就可以放寬逆周期措施，到那時候仍然持有物業的人就不用擔心銀行會突然call loan，而樓市在有足夠水源滋潤下，很快就會回復生機。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
