2025/09/16
湯文亮
星期日早上去到茶餐廳，有客人話銀行單咗一聲畀佢，新一姐上任，可能會向佢追收當日借畀佢買債券的investment loan，那些債券有部分已經違約，甚至清零，而做擔保的物業價值又跌了不少，就算賣走都可能唔夠填數，客人怪銀行當日sell佢買債券，現在就追佢數，暫時冇得還，希望可以債務重組。
我心想，銀行sell客買債券是冇問題，但點都諗唔到債券清零，樓價又下跌，最終令客戶輸錢而銀行又出現壞帳，屬於不可抗力，不過，用物業抵押買債券的客戶不是太多，起碼我未試過被銀行游說加大物業借貸來買債劵，相信只是對那些資深物業投資者，以及擁有大量物業的業主影響比較大，小戶是不用太擔心。
押樓買債券 部分債券已違約
老闆話，銀行到今時今日才call investment loan已經是有情有義，你估銀行唔知道有一些債券價格已經跌得很低，銀行可以隨時call loan，銀行唔call是希望客戶可以自行出售用於抵押品的物業。
如果銀行要call loan，一年前就可以call，唔使等到今時今日，但如果一年前call loan，不少買債券的客戶要賤價賣物業，對樓市有很壞影響。
銀行已經好忍手，並不是銀行家有菩薩心腸，只是當時call loan ，在爭相出貨之下，樓市必然會大冧，銀行亦會有巨額損失，現在雖然亦唔講得好，但仍然可以控制，現在樓市已經回穩，那些持有債券的業主要賣樓亦比較容易，樓價亦比較好。
當然，用物業抵押借錢買債券的都是大孖沙，銀行亦唔會趕盡殺絕，大家一定會搵到一個可行的方法來重組債務，唔會攬住嚟輸。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
