2025/09/12
湯文亮
星期四早上去到茶餐廳，有客人話恒指升超過二萬六，股市又成為人們飯前飯後談話內容，相信大部分人都在股市搵到錢，所以消費市場亦比較旺，尤其是蘭桂坊，有酒吧食肆經營者話生意已經有全盛時期八成，希望唔好係虛火。
不過，有一個怪現象，就是股票投資者不時會講下買樓，反之物業投資者很少講股票，唔通物業投資者收心養性，連股票都唔玩？客人可能唔知道，物業投資者唔係唔想玩股票，而是唔敢玩。
預留資金應付銀行 唔敢投資股市
老闆話，以優才及專才為首，大約25萬人的高消費群不斷湧入香港，中高檔消費市場的確有起色。不過股市雖然暢旺，但不是所有人都得益，在銀行call loan之下，持有物業的投資者要預留資金應付銀行，唔敢投資股市，錯過了今次股市升浪。不過，從股市獲利是其次，最緊要是可以渡過今次難關。
老實說，今次香港的物業投資者可以說是完敗，從內地來的資金因為不需要應付銀行call loan，可以全力投資股票，在6個月之後，累積了一定的利潤，就會轉去投資地產，就算樓價比6個月前略有升幅，但相比股票收獲，根本是微不足道。
所以，亦有不少人話，當股市升了6個月之後就會輪到樓市，就是這個道理。其實唔係輪到，而係投資者在股票市場搵夠，就會搵一些低水位投資，在現時環境，唔係物業又係乜。不過，又不是所有物業都值得投資，住宅當然可以，甲廈、舖位亦不俗，商場就要小心一些，施羅德都玩唔掂，一般投資者又點識玩。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
