2025/09/08
湯文亮
今早去到茶餐廳，有年輕客人話最近識到一個女仔，第一次約會大家傾得非常開心，仲話要約第二次，點知再約的時候，那個女仔畀佢食檸檬，客人諗極都唔明。老闆話知道點解，第一次應該係去好貴餐廳，第二次就去比較平民化的，很多時女仔見到咁嘅情况就會拒絕，不過咁都好，無謂浪費大家時間。
年輕客人話全中，咁樣應該點約才是最好？老闆話，與女仔約會好似食西餐，首先食開胃菜，然後飲湯，兩者相隔時間很短；飲完湯之後，侍應會掃下張枱麵包碎，然後上主菜，食完主菜隔一段時間就會問客人要唔要甜品，然後咖啡或茶。如果雙方交談甚歡，基本上會要埋甜品咖啡，否則就此打住。
「荷蘭式拍賣」約會 男仔易食檸檬
一個男仔約新相識女仔，千祈唔好一開始就去大餐廳，應該去女仔屋企附近，大約15分鐘路程的小餐廳，食完可送女仔返屋企。老實說，第一次約會，女仔及她的家人是非常緊張，如果能夠在兩小時內送女仔返屋企，一定會得到一個好印象。
打鐵就要趁熱，盡快約第二次，今次應該是跨區，去一些比較好，比較有特色餐廳，食完飯可以去飲杯嘢，再送女仔返屋企，去得幾次就要搞突破，甚至要一錘定音。食完開胃菜，飲完湯就要食主菜，一定要搵一家好的餐廳，文華廳都唔錯，不過就唔使飲香檳 。食完呢餐，基本上大局已定，幾時食甜品就雙方默契。
如果一開始就約女仔去大餐廳，然後去普通餐廳，女仔睇到「荷蘭式拍賣」約會，很容易請個男仔食檸檬，男仔在大餐廳用了啲錢就變成「沉沒成本」。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
