2025/09/01
湯文亮
星期六早上去到茶餐廳，所有客人都講緊一對網絡認識男女在文華中菜廳食飯，埋單8萬幾元，男方「借尿遁」，女方報警，兩個人都成為笑柄。
遇問題應一起解決
在未知道實情之前，大家都質疑兩個人點可以食到8萬幾元，在知道實情之後，原來是一支香檳累事，那支被稱為「香檳界中的勞斯萊斯」，成本兩萬幾元，餐廳收6萬幾元，套餐4000幾元，加埋一就要逾8萬元，男仔如果只是普通人家，想唔「借尿遁」都唔得。
有客人問，如果那支貴價香檳是女方叫的，男仔要不要負責？老闆就話，問題不是在於邊個叫，而是那名男仔不應該「借尿遁」，應該大家一起解決問題，甚至一起籌錢，反正都無下一次。如果女方搵到個男仔，而最終告上法庭，相信是要負責一半餐費。
有客人問，如果想在大餐廳飲香檳王，餐廳又唔收開瓶費，唔准自攜酒水，而客人又唔想畀咁貴，有無一些餐廳可以接受，而又唔損害餐廳利益辦法。
客人識做 皆大歡喜
老闆話古代有「狸貓換太子」，如果想在大餐廳飲靚酒又唔想畀咁貴，可以用「太子換狸貓」，自己帶支香檳王去餐廳，在點餐時，揀一支最平香檳，大約千幾元，成本兩三百元，然後要求餐廳開那支香檳王，客人帶走那支比較平的香檳，在餐廳方面是沒有損失，如果客人識做，就畀多一些小費，咁就皆大歡喜。
其實，唔用「太子換狸貓」，寧願畀多幾倍價錢飲貴酒，係會畀人笑做傻仔。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
