2025/08/27
湯文亮
星期一早上去到茶餐廳，有陌生客人要食酸菜魚，老闆話酸菜魚就無，仲叫佢講「英語」，即是ABCD餐，早餐廚房無時間煮酸菜，就算有茶餐廳肯煮，都唔會煮得好食，在唔同時段有不同餐單供應，叫唔同時段的餐只會又貴又唔好食。客人話明白，最後都要講「英語」。
老闆回答令我想起一個代理見我們不斷賣樓，而且又賣得幾好，叫我畀幾個盤佢去跑吓，我問什麼類型盤，住宅、商舖、甲廈，甚至一幢幢商廈都有，代理話唔知，總之希望我畀幾件貨佢去跑，百貨撞百客，賣到亦唔出奇。
有盤才搵買家 極可能白做
其實物業市場與茶餐廳一樣，唔同時段有唔同市場，有時是買家市場，有時是賣家市場，現在周街都係盤，好明顯是買家市場，代理應該先搵買家，搵到買家才去搵盤。現在買家是皇帝，有買家絕對唔怕搵唔到樓盤，如果現在先搵盤，有盤才去搵買家，極有可能是白做，因為除了買家不多之外，銀行唔做按揭，就算有心買都無能為力，就算搵到幾靚幾平的盤都無用。
有人問如何搵買家，唔通cold call，成功率很低。老實說，cold call是不能避免，不過首先就要向左鄰右里埋手，正所謂千金難買雙連地，問左鄰有無興趣買埋右里的單位，同樣問右里有無興趣買左鄰的單位，當中只要有一個人話有興趣，就出現一個買家，如果左鄰右里都有興趣，成功的機會很大。
如果先問左鄰賣唔賣，就算左鄰肯賣，但右里唔買，始終做唔成生意，其他人買入的機會又不高，有盤都無用，什麼百貨撞百客，而是一貨撞一客。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
