《貨幣強弱要與利息掛鈎》

星期六早上去到茶餐廳，發覺大家都舒口氣，美國聯儲局主席鮑威爾終於暗示9月會減息，道指升近900點，有客人話大多數香港人並不是擔心恒指是否會爆升，而是唔減息，聯繫匯率有機會再觸及弱方保證，銀行體系結餘繼續下跌，同業拆息就會繼續上升，香港業主又要捱貴息。

老闆話，今次觸及弱方保證與以往不同，以往是在投資者沽港元離開香港，印證港元的確很弱，但今次聯匯觸及弱方保證反證港元在強方。

雖然一定會有很多人不同意，甚至認為這是歪理，但在座的一名米芝蓮大廚可以做例子，大廚在10年前離開香港，回內地搵食，走遍大江南北，收取3倍香港薪金，做10年等於30年，現在可以退休。當他離開香港時，不少人問佢香港經濟是否很差，所以他要離開香港搵食，大廚話唔係，因為其他地方畀到更高薪金，如果薪酬相若，一定唔會離開香，大家話唔明。

特朗普不斷叫鮑威爾減息 避免炒家套戥

一隻貨幣強弱，一定要與利息掛鈎，美元有一段時間是極低息，但全世界資金都買美元，這代表美元在強方。現在10年美債息超過4厘，相對很多只是2厘至3厘息的國家是弱方，香港更加唔使講，在今次未加息之前，1個月同業拆息只是1厘，現在是約2.8厘，投資者點解唔借港元，沽港元，買美元，即使7.85沽，7.75買港元，以1億美元為例，蝕了1000萬港元，但賺了3厘利息，合計2340萬港元，更何况未必要用7.75買返港元，咁樣就賺得更多。

港元就好似米芝蓮大廚，出外搵食主要是因為薪金高，1厘利息港元出外搵食，收取4厘美元利息，強弱之勢十分明顯，特朗普睇通形勢，所以不斷叫鮑威爾減息，否則就會畀貨幣炒家做套戥，不但賺晒美國利息，而且仲令美國非常丟架。

有客人問，點解香港同業拆息急升，老闆話主要是貨幣炒家篤爆銀行體系結餘個波，不過今日大家都忙，明天繼續講。