2025/08/22
湯文亮
星期四早上去到茶餐廳，老闆話大富豪暫停營業，有無客人在重開之後去過大富豪？不但無客人去過，甚至連提及也很少，如果不是突然暫停營業，相信大家都唔記得大富豪。
雖然鄧小平話「香港舞照跳、馬照跑」，但如果大富豪不是一個投資移民項目，根本唔應該重開，畢竟現在消費者的態度與以往不同，以往要豪，一晚與一大班唔係咁相熟，甚至唔認識的人飲酒，消費大幅高於收入。不過，當時除了正職之外，飲酒作樂亦可以做到不少生意，搵到不少外快，如果不是有額外收入，一樣唔會有咁多人去俗稱銷金窩的娛樂場所。
現在唔好講香港，就算其他大城市，好似紐約、倫敦、東京等，都很難搵到大型娛樂場所。不過，如果與賭場掛鈎則例外，所以，大家仍然可以在新加坡、澳門、拉斯維加斯搵到大富豪式娛樂場所。
大家又唔好以為有錢佬無地方消費，有一些私竇可以替他們安排，搵一些靚女，開定幾支靚酒，大家猜吓枚，講吓鹹濕笑話，不亦樂乎，消費比去大富豪平得多，而且私穩度高，唔使應酬那些所謂江湖大佬，一不小心，很容易惹禍上身。
以往大富豪的消費群是香港人及外國生意人，內地人並不多，今次大富豪重開，相信目標消費群是內地人，其實是錯到不得了，現在內地的有錢佬都非常低調，去大富豪咁揚，很容易出事，沒有內地大富豪，生意又點會好，投資者有見及此，暫停營業是可以理解。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
