《美補貼換股權 嚇怕企業家》

星期三早上去到茶餐廳，老闆話有行家到來吐苦水，行家話生意本來做得好哋哋，亦打算同業主續約，點知隔離舖位業主話不但可以用優惠租金租畀佢，並且可以補貼裝修費，於是用了不少錢裝修，但新業主的補貼遲遲未到位，最近新業主話無條件補貼是無可能，要用20%股份來交換補貼。老闆行家話今次真係上了賊船，20%交換補貼都無問題，最擔心就是業主認為自己有20%股份，派親信監督茶餐廳運作，咁就麻煩。

拜登時代，以防止芯片技術由台灣轉移到中國大陸，於是邀請台積電（美：TSM，台：2330）去美國設廠，並且補貼龐大資金，當時台灣人民非常雀躍，認為美國佬睇得起他們，但是有人話台灣人被騙了還幫人數錢。其實，美國佬邊度會咁輕易發放補貼，或者補貼由未來所得稅扣除，原來大家睇得美國佬太過善良。

領取補貼的唔止台積電，仲有好多企業包括英特爾（美：INTC），現在有消息傳出，英特爾要以股權換補貼，相信很快會成事。其實，美國政府是「項莊舞劍，意在沛公」，目標並不是英特爾，而是台積電，由於有英特爾做先例，估計台積電亦不會反抗，最後成為美國國企。

不過，特朗普咁樣做就會嚇怕了其他準備拿補貼，將海外工廠搬返美國的企業家，他們並不是擔心要將部分利潤分畀美國政府，而事實上股東獲得合理利潤是正常的，他們擔心一旦美國政府入股之後，會派人監視工廠運作，以及睇實盤數，對於以後運作就會諸多不便，甚至會觸犯法律。老實說，如果早知道補貼是要以股權來換取，相信唔會有咁多公司接受補貼。