2025/08/13
湯文亮
星期二早上去到茶餐廳，有客人話近日有不少網紅在YouTube上笑我賣樓，大大話話有五六十個視頻咁多，大賺的當然唔講，蝕本的就畀佢哋笑到失暈。不過亦有網紅說句公道話，由幾百萬元做到現在有百幾億元，期間仲養活了咁多家庭，捐咗咁多錢，就算現在輸返多少，都應該今生無憾。
老闆話，網紅現在的行為，就是懲罰努力解決問題的人，有不少投資者或者持有多個物業的業主唔敢賣樓，並不是怕蝕本或者唔捨得賣，而是擔心賣樓消息出街之後，一定會引來一班網紅恥笑，甚至會起底，所以唔敢賣樓。在現時形勢，樓價是不會突然飈升，要解決借貸比率太高的問題，唯一可以做的就是賣樓，等並不是一個好辦法。
有投資者在自住單位變成銀主盤之後表示，當日打算賣走幾個物業，而且已經有offer，就算蝕本賣都無所謂，最緊要滿足銀行要求，可以繼續持有其他物業。但消息出街之後，立刻畀YouTuber起底兼筆伐，為表示自己財政無問題，最後當然唔賣，錯失了賣樓良機，如果當日賣走一些物業，就唔使連自住單位都要變成銀主盤。
老闆可能唔理解，網紅現在並不是懲罰賣樓的投資者，而是嚇怕了打算買樓的人。老實說，投資者係唔想賣樓，可以唔賣都唔賣，話網紅懲罰他們只是一個藉口唔賣樓，現在賣樓，一定要賣優質單位，質素稍差的根本無人吼。
如果現在仍然有錢買樓的人，如果唔係教育團體、宗教團體，除非剛剛分了身家，否則一定很細膽，幾十年來有錢都唔敢買樓，本來現在買樓的風險很小，那些細膽的人已經準備買樓，但畀網紅一唱，立刻縮沙，以後就很難買到咁優質的物業。雖然大家都唔知道樓市走勢，但新樓熱賣，租金上升，潛在供應量下降，利息在低水平，大行已經轉軚，咁嘅情况仲聽網紅講樓市大冧，買唔到靚樓都無人可憐。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
