2025/08/07
湯文亮
星期三早上去到茶餐廳，有客人問老闆，最近有一間茶餐廳開張兩日就執笠，既然可以開張，最低限度都要好似香蕉煎餅，捱兩個月才執笠，究竟有沒有大家都唔知的原因。
老闆話，如果茶餐廳只是幾個拍檔經營，當然唔會立刻執笠，估計茶餐廳是股份制，股東是內地人，夾幾十萬元就可以在香港做老闆，幾咁開心。
股東持有的股份，大有可能已經超出一倍甚至幾倍，搞手不但自己不用出錢，而且可以隨時收割，只要茶餐廳執笠，所有股東的投資都會落入搞手手中。千祈唔好以為那些股東有怨言，只要搞手同他們講，如果要茶餐廳繼續經營下去，就一定要再夾錢，他們寧願退出都唔會夾錢。不過，今次只是開張兩日，似乎搞手太過心急，見到已經收咗咁多錢，早日埋單計數，那些投資茶餐廳的人當買一個教訓。
除了茶餐廳之外，酒樓亦會出現類似情况，最近有幾間酒樓結業，相信很快就會以另一名字在原址重開，原因是那些酒樓不會是獨資經營，而且由一個搞手集合了一班股東投資，結業的酒樓孭了一筆為數不菲的債務，股東亦唔打算再投資，搞手唯有將酒樓結束。
待搞清一切債務問題之後，搞手就會搵過另一班股東投資，由於基本設施已經齊全，搞手不用投放太多錢，新股東可以用較少資金入股一間酒樓，很多時搞手反而希望酒樓執笠，否則就搵唔到食。世界就是這樣的，投資一個唔了解行業，又不能親力親為，可能蝕到渣都無。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
