《樓市好轉 業主反口唔賣好正常》

星期一早上去到茶餐廳，有客人話幾個月前打算賣走一個單位，開價非常克制，但一直無人還價；但近日有物業代理話畀到價錢，但他唔係好捨得賣，况且又已經賣走另一個單位，已經唔係咁急要賣，於是同代理講唔賣。點知畀代理鬧，客人話唔通話賣一定要賣。

老闆話，銀行call loan已經call了一段時間，不少被call loan的業主及投資者都被迫賣走一些物業，銀行現在萬事有商量，又唔係迫得咁急，况且樓市亦有轉好迹象，不但樓價指數、租金上升，負資產亦減少，連甲級商廈亦出現正吸納量，有很多二手樓盤出街唔夠一日就已經有人買咗。代理必然搵返以前打算賣樓的業主，希望他們唔知樓市現况，在不知情况賣了較早前打算賣走的物業。

樓價指數升 負資產降

傳媒現在仍然集中報道劈價蝕讓成交，但無講那些大多數是銀主盤，大家都知道銀主盤的作價不能作準。

事實上，市場已經有不少有錢賺的「摩貨」成交，但傳媒很少報道。負資產數量由過去3季在大約4萬宗，降至最近一季的3.7萬宗，代表有不少負資產物業以銀主盤方式被賣走，但現實是銀主盤數量仍然保持在300個單位左右，意思是銀主盤的吸納量是非常龐大，差不多只要銀行將銀主盤推出市場，很快就會被吸納，而買銀主盤的大多數是老手，他們已經很難在市場上買到平貨，唯有將注意力集中在銀主盤。

至於點解他們很難在市場買到價錢較低物業，就是業主反價或反口唔賣。老實說，做得業主一定唔會係傻仔，除非迫不得已，否則唔會賤賣自己物業，反價或反口唔賣是很正常，買家千祈唔好怪他們。