《一個「未」字救了我們》

星期四早上去到茶餐廳，有客人話近日物業投資者兵敗如山倒，有人「躺平」，有人債務違約，甚至有人要破產，我們算是比較好，在這個環境下，仍然可以自己賣樓，不受銀行掣肘。究竟是什麼原因在疫情之後，我們突然停止買樓。

我發覺所有客人都竪起耳仔聽我講，我亦唔吝嗇，將我收到的信息講出嚟。在疫情之後，我唔記得確實時間，有一名資深投資者突然問我有無畀銀行call loan，當時我還有超過10億元現金可以運用，點會畀銀行call loan，於是立刻話無，對方話「未」。我雖然唔知道什麼原因，但感覺事有蹺蹊，立刻停止所有收購行動，即使銀行已經批出按揭貸款，我們仍然取消，雖然沒有即時出售手上物業，但仍然是非常好彩，否則，今日我們也可能要「躺平」。

雖然我們沒有即時出售手上物業，但提高警覺，將手上有機會出售的物業做好準備，如果有需要而價錢又合理，我們是會出售，做了咁多準備工夫才能夠在適當時候賣走十幾億元物業。銀行對我們做法亦相當認同，如果樓市不繼續下跌，今次銀行call loan危機算是過去；但如果樓市繼續下跌，咁就「同志仍需努力」，不過我們是拒絕「躺平」。

大銀行業績不佳，不良貸款增加，股價大跌，有人話銀行亂咁call loan造成，如果銀行唔追差額，就唔會有咁多壞帳。老實說，如果每一個客戶都準時還款，銀行都唔想call loan，但有客戶在取得貸款之後，第一次供款已經「躺平」，銀行有乜辦法唔call loan？就算殺錯良民，供款準時的客戶都要call，那名資深投資者睇通睇透，我就無咁嘅功力。