2025/07/28
湯文亮
星期六早上去到茶餐廳，有客人話近日傳出不少投資者唔掂，被銀行call loan，究竟有無投資者埋怨銀行，每一個客人，連老闆都望住我，想唔答都唔得。
我講大家都唔信，所有投資者都無埋怨銀行，反而埋怨自己唔識得見好就收，沒有趁高位放售一些物業，最多只是希望銀行call loan唔好call得咁急，畀條生路大家行。
冀銀行畀條生路大家行
就好似在賭場，一個賭仔輸錢之後問「大耳窿」借錢繼續賭，最後又輸埋，但賭仔唔會埋怨「大耳窿」，最多是埋怨自己運氣差。所以，物業投資者是唔會埋怨銀行，這個世界是「有強姦、無焗賭」，如果投資者唔買樓，銀行又點借錢畀佢，銀行家大可以放心。
反怨自己唔識見好就收
有客人話，在這個浪潮，有不少銀行職員被炒，聽講有不少物業投資者聘請那些銀行職員頂住銀行call loan，貪他們熟頭熟路，知道銀行「罅隙」，拖數都比較容易。
老闆話，醜婦最終都要見家翁，暫時無錢還搵前銀行職員去頂，其實是有反效果，銀行會認為客人資不抵債，call得仲急，倒不如實實在在賣樓還貸，銀行見投資者已經賣緊樓，就唔會call得咁急，這才是正確做法。
老闆可能唔知道，投資者現在賣樓要承受很大壓力，YouTuber 一定會群起攻之，如果所賣的物業賺錢就不會講，如果是蝕錢，一定會畀人唱到失魂。其實，就算是蝕錢都是賺返嚟，有什麼大不了，如果唔問銀行借錢買樓，連蝕錢的機會都無，這才悲哀。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
