2025/07/21
湯文亮
上星期六早上去到茶餐廳，有一個陌生客人食完早餐之後話出品唔錯，點解會有人講好差，老闆話唔出奇，不少被炒舊伙計同其他人講茶餐廳出品好差，已經見怪不怪。
近日有外媒報道，香港銀行壞帳率高達2%，到年底可能去到2.3％，有客人質疑有無咁多。
老闆話，焦點並不是壞帳率有冇咁高，而是邊個接受訪問，如果是一個被炒的銀行職員講的，對消息持保留態度，試問一個舊伙計又點會講老東家好說話，尤其是匿名者。
如果壞帳率達2%，的確是一個極壞消息，不過，金管局立刻強調銀行體系健全，及後有關報道已經將壞帳改為不良貸款。
壞帳與不良貸款 天淵之別
老實說，其實兩者有天淵之別，壞帳有可能「柳毅全輸」，一毫子都攞唔返，而不良貸款，經過一番操作，例如沒收貸款人的物業，變成銀主盤在市場發售，不但有可能取回全部貸款，而且仲可以收取手續費並且在期間可以收取高息，可能沒有損失。
銀行點解出現2%不良貸款，其實都是自己攞嚟，測量師行將樓宇估價大幅降低，銀行迫不得已向客戶追差額。
老實說，按揭邊度可能即時有錢還，唯有賣樓還貸，不過要賣樓亦唔係咁容易，部分客戶跟唔上被迫「躺平」，最後演變成債務違約，那些違約債務亦可以解讀為不良貸款，佔全港貸款金額2%，大約250億美元絕不出奇，但那些不良貸款大多數有抵押品，賣走之後絕對可以清還貸款，咁樣就唔係壞帳。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
