《如果我是鮑威爾會立即辭職》

星期二早上去到茶餐廳，有客人話香港銀行體系結餘下降至接近1000億元，最近已經唔見了700億元，金管局總裁余偉文已經提醒大家同業拆息可能會繼續上升，言下之意，買樓就要付比較高利息，全港業主都是關注美聯儲局幾時減息，而特朗普已經打晒開口術，任命白宮發言人叫鮑威爾辭職，究竟鮑威爾是否能夠完成任期？

老闆話，鮑威爾應該不能完成任期，如果佢係鮑威爾會立即辭職，否則日後美國經濟轉差，出現大額財赤，通脹上升，特朗普一定會將責任歸咎於鮑威爾。如果老鮑辭職，特朗普要負全責，既然如此，老鮑點解唔順水推舟，唔做美聯儲主席，等特朗普孭鑊。

君子不立危牆之下

老實說，鮑威爾唔肯減息的確有其理由，因為減息，美元必弱，通脹必升，特朗普唔係唔知，所以逼美聯儲局減息，等鮑威爾孭鑊，試問老鮑明知要孭鑊，又點會減息，所以，辭職是最好辦法，老鮑唔應該再猶豫。

特朗普對減息早有準備，所以推出「對等關稅」、美國「金卡」應對，倘若美聯儲局減息，通脹定必上升，不過大家可以話「對等關稅」令通脹上升，與減息的關係不大。「對等關稅」雖然令通脹上升，但亦有不少稅收，可以說功大於過，而減息令美國畀少很多美債利息，否則，關稅收入未知是否能夠彌補美債利息支出，但美聯儲局又遲遲唔減息，而「對等關稅」又唔係進行得咁順利，隨時受到雙重損失，特朗普一定會搵人孭鑊，鮑威爾是不二之選。所以，鮑威爾要立刻辭職，等唔識經濟的特朗普團隊自己玩，搞到一鑊粥，等他們自己孭鑊，正所謂君子不立危牆之下，幅牆就冧，點解仲唔走。