2025/07/11
湯文亮
星期四早上去到茶餐廳，有客人話我好脾氣，近幾個月不少YouTuber指名道姓唱我唔掂，我好似無嘢，唔作出反擊。初時大家都以為YouTuber講中，所以我唔敢反擊，但過了幾個月都唔見到我債務違約，反而有其他投資者甚至地產商出現債務違約，點解YouTuber唔講他們反而集中講我？
老闆話，YouTuber唔係唔想講他們，而是唔敢講，原因是那些人的勢力很大，無謂惹禍上身。老闆可能講得對，不過，我信奉言論自由，YouTuber詆譭我反而對我有利，我點解要阻止他們？
買嘢的人有一個心態，就是同急於要賣的人買，好大機會攞到最好價錢、最好條件。樓價下跌，銀行向投資者追差額是天經地義的事，但試問一個身家豐厚的投資者點會公開對人講自己被銀行追差額，就算叫物業代理放售，都加多句話要低調進行，叫個客畀價等佢考慮，賣得咁含蓄又點可以賣到樓？
YouTuber講我唔掂，無形中幫了我，而我出售的物業質素唔錯，買家知道我急於賣，既然要買樓點解唔同我買？近幾個月賣了價值十幾億元物業，銀行家都叫我撰文多謝YouTuber。
投資者現時賣樓絕不可恥
其他被銀行追差額的投資者，由於沒有YouTuber幫手，賣來賣去都賣唔郁，最後變成債務違約。
老實說，現在投資者賣樓絕不可恥，樓價下跌，賣樓將借貸比率保持在合理範圍是理性做法，千祈唔好戴住有色眼鏡睇他們，反而要讚投資者賣樓是拒絕「躺平」，這是負責任的行為。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
