2025/07/04
湯文亮
星期四早上去茶餐廳，有客人話樓市下跌，有學者以勝利者姿態講樓市，仲話樓市會繼續下跌四、五成，彷彿業主是傻佬，仲譏笑物業投資者沒有學問，連經濟差都唔知道，生意失敗是理所當然。
老闆話落井下石非英雄所為，不過就得到很多掌聲，現在是否經濟差就見仁見智，不少舖頭食肆生意仍然唔錯，尤其是新開的食肆，學者應該從這方面探討，點解舊店做唔掂，新店做得掂，學者唔係講一句經濟差就當分析。
政府中小企貸款 成沉重包袱
大班全線執笠，但Bakehouse崛起， 仲愈開愈多，而且差不多每間分店都成為網紅店，當中除了出品之外，最主要原因是大班孭了一筆債，Bakehouse就輕裝上陣，好似跑馬一樣，負磅太重，跑長途一定輸梗，做生意是跑長途，負磅太重，不如早日墮馬好過。
經歷疫情的食肆或者零售店，就算捱得過，或多或少都欠了一筆錢，雖然政府提供中小企貸款，但唔係唔使還，那筆就是沉沒成本，如果沉沒成本太大，就算經濟形勢好轉，食肆有錢賺，最後仍然要執笠，這就是近日咁多舖頭執笠的原因，學者無理由唔知道這個原因。
如果學者們能夠高瞻遠矚，在推出中小企貸款時就警告政府，中小企貸款雖然可能令商舖暫時不用執笠，但孭了一筆巨債，執笠是遲早的事，而且很難翻身，倒不如在疫情時候執笠，18年後又是一條好漢，而且執笠可以令其他食肆生存，這是楢山節考精神，唔係咁多人明白。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
