《上市是起點抑或終結》

星期三早上去到茶餐廳，有客人話近日不時入票認購新上市公司的股票，差不多每一次都有斬獲。記得以前就算申請成功，但股價很快就「潛水」，輸了唔少錢，搞到唔敢認購，點解以前新股上市後就會「潛水」，現在就大有斬獲？

老闆話，這是一個態度問題，以前可以成功在香港上市的公司，以能夠上市作一個終結，當公司上市之後，他們目的已達，再不用理會公司股價升跌，沒有護盤人，股價想唔跌都難，最後搞到投資者對在香港上市的新股意興闌珊。

有一個時期，香港的IPO世界排名下降至第六，比印度、印尼還要低，根本唔可以接受，以這個排名，點可以叫自己做金融中心，好彩後來港交所（0388）改變策略，以孔子的有教無類接受更多新上市公司，IPO排名才可以回升。唔講大家唔知，到今年為止，香港IPO世界排名第一，由此可見，改變策略是幾咁重要。

不過話分兩頭，就算港交所改變策略，令更多公司能夠在香港上市，但上市公司的「揸fit人」心態不變，香港股市是不會做大做強 。當日，在香港上市的公司以上市為終點，上市之後立刻發出盈警，股價下跌，令到支持者非常失望，今日在港上市的大多是內地公司，他們以在香港上市為起點，上市之後有很多新計劃，而股價亦隨之而上升，投資者見狀，當然是趨之若鶩，這是心態問題，如果上市公司以上市為起點的心態不變，港股大有作為。