2025/06/16
湯文亮
星期六早上去到茶餐廳，聽到有客人恭祝老闆生日快樂，老闆講多謝之後，立刻話真晦氣，與特朗普同一日生日，聽聞6月14日有1800場示威慶祝特朗普生日，老實說，真係唔知點收科。
老闆話，的士牌價下跌，有人叫政府以每個500萬元收回的士牌，都話對政府來說是「濕濕碎」，那人可能唔明白，政府啲錢叫公帑，點可以亂咁用？不但唔會成事，仲會被人笑，地產界應該唔會出現咁嘅人。
老闆此言差矣，當樓市滯銷，樓價下跌的時候，曾經有老行尊叫政府設立一個基金買那些滯銷細價樓，待樓市回升，將那些細價樓出售，不但可以救樓市，日後仲可以賺一筆，好似盈富基金（2800）一樣。不過，反應並不熱烈，最後不了了之，因為大家都知道，賭博投資，各安天命，點可以姓「賴」？
風險須自己承擔
那個叫政府以500萬元一個收返的士牌的人兄，如果他有幾個，甚至幾十個，他一定是一名投資者，投資風險一定要自己承擔，點可以叫政府回收？如果他沒有的士牌，又無資格出聲，而事實上的士牌價曾經炒到咁高是因為壟斷引致，並不是自由市場買賣價，作為一個壟斷者，更加要顧及風險，萬一有替代品出現，壟斷便失去作用，貨物便不值錢。
Uber不是突然之間出現，不過因持有的士牌的人漠視，以為在緊急關頭，政府會出手相助，甚至上京投訴，由中央政府指示香港禁網約車；事實上，整個中國都是網約車，又點可以叫香港禁止，唯有叫香港政府回購車牌。不過，講都多餘，因為政府唔敢做。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
