《定存息大跌 食息族寧願消費》

星期二早上去到茶餐廳，有客人話前晚有朋友請食飯，菜式非常豐富，據他的了解，朋友仍然供緊幾層樓，點解仲要請食大餐；反而另一名朋友，每月都收取數目不菲的定存利息，但從來沒有請過食大餐，最多是一些「蒼蠅小館」。

老闆話，現在供緊樓的人每月都要預一筆款項供樓，如果有幾層樓，欠債2000萬元，現在利息比兩個月前下跌3厘，每年少付60萬元，每月少付5萬元利息，一個大度業主，會作出適量消費來回饋社會。所以，當利息下跌，消費的人多了，如果利息太高，那些業主都要預留款項供樓，又點會有人消費。

香港有一大班食息一族，但如果靠那班人撐經濟，香港一定死得。食息一族的人有一個特點，就是有守財奴性格，叫他們消費，他們會話不如慳番消費的錢做定存，收取高息，複息令財富增值更快，點解要消費？但是一個社會經濟繁榮，是建基於消費之上，有能力的人都唔消費，香港又點會有運行，搞幾多盛事，幾多「夜繽紛」都無用，那些有錢做定存的人只會去睇吓，唔會消費。

但當利息下降，不但現在付高息的人，因為少付利息而消費，同時，那些收定存利息的人見到無息收，反而會消費，多了人消費，唔使搞盛事以及「夜繽紛」香港都會旺，不過，搞就更加好。

利息下降不但有利香港，美國也是一樣，否則特朗普就唔會成日叫鮑威爾減息，如果唔減息，美國人的收入就會被財閥用利息名義沒收，邊度仲有錢消費，無人消費，美國經濟就會出現倒退，這是特朗普唔願意見到的事。所以，美國很快就會開始減息，美國減息，香港低息環境就會持續，香港的業主唔使咁辛苦，大家有多餘錢消費，最後會發覺，點解政府唔使搞推廣，市面竟然旺了咁多，所以，利息低是幾咁重要，利息唔低唔會有人消費。