2025/06/09
湯文亮
星期六早上去到茶餐廳，有客人話我賣樓，中文報紙以「八卦」姿態報道，大家都明白，但點解英文報紙可以咁詳細報道，唔通香港真係無新聞？客人唔明白點解大家都認為樓市形勢很差，而我又可以賣到樓。
報紙的確可以報道，但也可以用另一種形式探討，既然大家睇樓市睇得咁淡，點解仲有人買樓，代理又如何促成那些交易，咁樣報道或者令讀者更加有興趣。
老闆話，平日都有很多代理到茶餐廳食下午茶餐，他們話生意唔好，將午餐改為下午茶餐，甚至變成晚餐；至於點解生意唔好，就是他們知道，樓價會繼續下跌，都唔知點樣叫客人買樓。那些代理唔知道，這個世界「沒有米貴，只有運滯」，自己都睇唔好樓市，又點可以在樓市搵到食。
代理應有客時才鋤價
在這大半年來，不少分析員以及物業代理都話樓市會大跌，事實上，樓價指數在去年9月是135點，8個月之後，到上星期五亦是135點，樓價幾乎停留不動，物業代理如果這段時間叫到客人買樓，一定唔會畀客人鬧，但奈何物業代理自己有心魔，他們認為樓價繼續下跌，試問有咁嘅心態，又點可以做到生意。
有客人問我，如果他想賣樓，應該點樣做，他曾經同一些代理講賣樓，雖然知道代理一定會鋤價，但仍然畀他們講到心都實晒。其實，代理唔係鋤價，而是鋤自己生意；不過，代理唔係唔鋤價，但應該等有客有offer的時候才鋤價，在未有客的時候講得太淡，業主隨時會話利息下跌，負擔輕了，等樓市形勢比較好的時候才賣樓。如果代理連個盤都攞唔到，又點會有生意。
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意）
▸更多文章：投資心得文章 | 湯文亮 紀惠集團行政總裁
（文章內容純屬作家個人意見，並不代表本網頁立場）
贊助
