《明知被人窒 梗係唔去》

星期四早上去到茶餐廳，有客人話不聽老婆言，吃虧在眼前，周三晚同學聚會，老婆叫佢唔好去，因為每一次去都是被班長窒，亦有同學幫口，以往家境普通，被人窒笑吓就算，現在家境富裕，仲要被人窒真係頂住條氣，早知唔去，費用照交就算。

老闆話，被人窒當然唔去，好似今次在新加坡香格里拉舉行的軍事對話，中國明知會被人窒，所以國防部長董軍沒有出席，只派了沒有實權的國防大學副校長做代表。一如所料，會議一開始便針對中國，法國總統馬克龍最先發言，話中國破壞南海平衡，不過，馬克龍點講都只是嘴炮，法國機王「陣風」輸畀「殲10CE」，牌面唔夠，講乜都無用。馬克龍發言之後，美防長以及其他國家領袖陸陸續續發言針對中國，董軍唔去，係「無眼屎乾淨盲」，擺明睇唔起你一班人。香格里拉對話，今屆應該是最後一屆，就算繼續舉辦，大家都會派一些「二打六」出席，咁嘅會議，唔搞好過搞。

老闆問那名前晚被同學窒的客人，晚飯時在廁所見到那些同學有無講對唔住，客人話真係有。不過講完繼續窒，這就是外國人文化，在會議上窒到一些人懵口懵面，但有機會就立刻講對唔住。所以如果董軍出席，法國總統在致辭完畢之後，立刻就會講對唔住，唔通唔想賣空巴畀中國。其實，中國已經試過中伏很多次，無論魏鳳和或者李尚福，都在會中被美防長及歐美國家代表窒到飛起，之後他們又講對唔住，李尚福已經左閃右避，但仍然被美國黑人防長奧斯汀埋身講對唔住，最後害到李尚福丟官。至於外國人點解咁在意講對唔住，他們認為，講了對唔住表示事情已經告一段落，如果對方反駁，就是對方小氣。

有客人問，中國人幾時才會講對唔住，以中國人習慣，贏咗就會講對唔住，所以，中國在今屆法國航空展發言時應該講對唔住，至於點解要講對唔住，大家明白嘅。